Նորություններ Subheading

Դե' ինչ հարգելի՛ հայրենակիցներ, եկեք ամփոփենք 2022թ-ը.

տարին լի էր բազմաթիվ հաղթանակներով և նվաճումներով Հայաստանի շախմատի ֆեդերացիայի համար: Հաջող կազմակերպվել և անցկացվել են ազգային ու միջազգային մի շարք մրցաշարեր: Կազմակերպվել են հետաքրքիր դասընթացներ և ուսումնամարզական հավաքաներ՝ նպաստելով մեր շախմատիստների հետագա առաջընթացին և զարգացմանը: Հաջող համագործակցել ենք ՖԻԴԵ-ի, Եվրոպայի շախմատի միության, բազմաթիվ համաշխարհային շախմատային կազմակերպությունների հետ:

2022թ-ը սկսվեց հաղթանակներով: Մեր Գաբրիել Սարգսյանը տարեսկզբին նվաճեց Եվրոպայի շախմատի անհատական առաջնության արծաթե մեդալը: Ապա հաղթանակների շարքը շարունակեց Հայաստանի շախմատի ազգային հավաքականը (Գաբրիել Սարգսյան, Հրանտ Մելքումյան, Ռոբերտ Հովհաննիսյան, Սամվել Տեր-Սահակյան, Մանուէլ Պետրոսյան, գլխավոր մարզիչ՝ Արման Փաշիկյան), Հնդկաստանի Չեննայի քաղաքում, կիսելով 1-2-րդ հորիզոնականները, նվաճեց արծաթե մեդալը: Փայլուն հաղթանակ գրանցեց Մարիամ Մկրտչյանը, ով մինչև 18 տարեկանների Աշխարհի առաջնությանը 11-ից 11 հաղթանակ տանելով՝ նվաճեց ոսկե մեդալ: Սակայն սրանով չսահմանափակվեց Մարիամի հաջողությունները. նա, զբաղեցնելով առաջին հորիզոնականը Եվրոպայի պատանեկան առաջնությունում, Թուրքիայում ծածանեց եռագույնը և երկիր վերադարձավ ոսկե մեդալով: Թուրքիայում Եվրոպայի պատանեկան առաջնությանը եռագույնը ծածանեցին նաև մեր տղաները՝ Մամիկոն Ղարիբյան (Մ18, բրոնզե մեդալ), Էմին Օհանյան (Մ16, բրոնզե մեդալ), Բենիկ Ագասարով (Մ14, բրոնզե մեդալ): Տարին փայլուն եզրափակեցին Շանթ Սարգսյանը, ով նվաճեց Եվրոպայի կայծակնային շախմատի բրոնզե մեդալը, և Հայկ Մարտիրոսյանը, ով դեկտեմբերի 30-ին դարձավ ՖԻԴԵ-ի Աշխարհի կայծակնային շախմատի բրոնզե մեդալակիր:

Շնորհակալ ենք բոլորի՛ն, հաղթանակների, ձեռքբերումների, աջակցության և հաջող համագործակցության համար:

Թո՛ղ 2023թ-ը լինի նոր նվաճումների և ձեռքբերումների տարի, թո՛ղ եռագույնը միշտ հպարտ ծածանվի, ու խաղաղություն լինի ամենուր:

Շնորհավոր Ամանոր և Սուրբ ծնունդ