Նորություններ Subheading
տեղադրվել է 2021.05.31 03:55
1-ին փուլի հաղթող դարձավ ՀՀ փաստաբանների պալատի 1-ին թիմը
Հայաստանի շախմատի ակադեմիայում տեղի ունեցավ Հայաստանի կորպորացիաների շախմատի Գրան-Պրի-ի 1-ին փուլը, որին մասնակցեցին 22 թիմեր։ Գրան-Պրի-ն բաղկացած է լինելու 5 փուլերից։
Մի շարք կազմակերպություններ մրցաշարին ներկայացել էին մի քանի թիմերով։ Մրցաշարի բացմանը մասնակիցներին ողջունեց Հայաստանի շախմատի ֆեդերացիայի նախագահի առաջին տեղակալ, գրոսմայստեր Սմբատ Լպուտյանը, ով իր ողջույնի խոսքում ընդգծեց նման մրցաշարերի կարևորությունը և հույս հայտնեց, որ հաջորդ տարի Հայաստանը ներկայացնող թիմերը կմասնակցեն նաև աշխարհի և Եվրոպայի կորպորացիաների առաջնություններին։
Չնայած, որ մրցաշարն անցնում էր ընկերական մթնոլորտում, բոլոր թիմերն էլ ցանկանում էին արժանանալ հաղթողի կոչմանը։ Կորպորացիաների առաջին մրցաշարում, սակայն, բոլորից ուժեղ գտնվեցին հայ իրավաբանները․ առաջին հորիզոնականը զբաղեցրեց ՀՀ փաստաբանների պալատի 1-ին թիմը, որի կազմում հանդես էին գալիս փաստաբաններ Զոհրակ Ապրեսյանը, Արմեն Վարդանյանը, Լևոն Վարդապետյանը և Կարեն Մեժլումյանը, իսկ ՀՀ փաստաբանների պալատի 2-րդ թիմը զբաղեցրեց 2-րդ հորիզոնականը․ թիմի կազմում հանդես էին գալիս Աշոտ Շահմուրադյանը, Հմայակ Ղարիբյանը, Սերգեյ Ամիրխանյանը և Մարտիկ Մարտիրոսյանը։ Լավագույն եռյակը եզրափակեց Հայաստանի էլեկտրական ցանցերի 1-ին թիմը։
Թիմերը կազմավորելու համար մասնակից կազմակերպություններից շատերը անցկացրել էին ներքին ընտրական մրցաշարեր։
Մրցաշարի հաղթողներին շնորհվեցին արժեքավոր մրցանակներ, իսկ բոլոր մասնակիցներին՝ մասնակցությաւն վկայականներ։ Հաղթողներին պարգևատրեց Հայաստանի շախմատի ֆեդերացիայի նախագահի առաջին տեղակալ, գրոսմայստեր Սմբատ Լպուտյանը։
Գրան-Պրի-ի 2-րդ փուլը նախատեսվում է անցկացնել հուլիս ամսին։
