Նորություններ Subheading
տեղադրվել է 2020.09.22 01:31
Գավաթակրին և մրցանակակիրներին պարգևատրեցին Երևանի քաղաքապետ Հայկ Մարությանը, Երևանի շախմատի ֆեդերացիայի նախագահ, ՀՀ ԱԺ պատգամավոր Մխիթար Հայրապետյանը և ՀՀ ԱԺ պատգամավոր, շախմատի ազգային վարպետ Արտակ Մանուկյանը։
Երեկ Տիգրան Պետրոսյանի անվան շախմատի տուն-մարզադպրոցում ավարտվեց Երևանի Գավաթի խաղարկությունը։ Մինչ այդ 500-ից ավել մասնակիցներ մասնակցել էին Գավաթի խաղարկության տարբեր փուլերին։ Երեկ տեղի ունեցան մրցաշարի 1/4 եզրափակիչ, կիսաեզրափակիչ և եզրափակիչ մրցախաղերը։ 1/4 եզրափակիչ փուլին մասնակցում էին 8 գրոսմայստերներ՝ Մանուէլ Պետրոսյանը, Զավեն Անդրիասյանը, Ռոբերտ Հովհաննիսյանը, Շանթ Սարգսյանը, Տիգրան Պետրոսյանը, Հայկ Մարտիրոսյանը, Հովհաննես Գաբուզյանը, Հովիկ Հայրապետյանը: Մրցախաղերը բաղկացած էին 2 արագ շախմատի պարտիաներից՝ 10+5 ժամակարգով, հավասար հաշվի դեպքում նշանակվում էին 2-ական լրացուցիչ պարտիաներ՝ 3+2 ժամակարգով, իսկ այստեղ էլ հավասարության դեպքում՝ որոշիչ պարտիա՝ Արմագեդոն, որտեղ սպիտակներին տրվում է 5 րոպե, իսկ սևերին՝ 4, սակայն սպիտակներով հանդես եկող շախմատիստը պետք է հաղթի։
Բոլոր մրցախաղերը անցան հավասար և լարված պայքարում։ 1/4 եզրափակչի 4 մրցախաղերից երեքում հաղթողները որոշվեցին միայն Արմագեդոնում։ Այսպես Զավեն Անդրիասյանը Արմագեդոնում հաղթեց Տիգրան Պետրոսյանին, Ռոբերտ Հովհաննիսյանը՝ Հովհաննես Գաբուզյանին, իսկ Շանթ Սարգսյանը՝ Հայկ Մարտիրոսյանին։ Մանուէլ Պետրոսյանը Հովիկ Հայրապետյանի նկատմամբ հաղթանակ տոնեց կայծակնային պարտիաների ընթացքում։
Կիսաեզրափակչի երկու մրցախաղերում ևս հաղթողները որոշվեցին Արմագեդոնում։ Լարված և հավասար մրցախաղերում Մանուէլ Պետրոսյանը և Զավեն Անդրիասյանը համապատսախանաբար ուժեղ գտնվեցին Շանթ Սարգսյանից և Ռոբերտ Հովհաննիսյանից։
Եզրափակչում Արցախը ներկայացնող Մանուէլ Պետրոսյանը 1,5 - 0,5 հաշվով հաղթանակ տոնեց Զավեն Անդրիասյանի նկատմամբ և դարձավ Երևանի Գավաթի հաղթող։
Գավաթակրին և մրցանակակիրներին պարգևատրեցին Երևանի քաղաքապետ Հայկ Մարությանը, Երևանի շախմատի ֆեդերացիայի նախագահ, ՀՀ ԱԺ պատգամավոր Մխիթար Հայրապետյանը և ՀՀ ԱԺ պատգամավոր, շախմատի ազգային վարպետ Արտակ Մանուկյանը։
