Նորություններ Subheading
տեղադրվել է 2020.03.23 12:24
Մրցաշարի մասնակիցները, սակայն, դժգոն են մրցաշարի անցկացման պայմաններից:
Երեկ տեղի ունեցավ հավակնորդների մրցաշարի 5-րդ տուրը: Տուրում միակ հաղթանակը տոնեց Յան Նեպոմնյաշչին. նրա մրցակիցն էր Չինաստանը ներկայացնող Վան Հաոն: Կիրիլ Ալեքսեենկո - Մաքսիմ Վաշիե-Լագրավ, Անիշ Գիրի - Ֆաբիանո Կարուանա և Ալեքսանդր Գրիշչուկ - Դին Լիժեն պարտիաներն ավարտվեցին հաշտությամբ: 5 տուրից հետո մրցաշարային աղյուսակը 3,5 միավորով սկսեց միանձնյա գլխավորել Յան Նեպոմնյաշչին, 3 միավորով 2-րդ հորիզոնականում է ընթանում Մաքսիմ Վաշիե-Լագրավը: Վան Հաոն, Գրիշչուկը և Կարուանան վաստակել են 2,5-ական միավոր, իսկ Դին Լիժենը, Գիրին և Ալեքսեենկոն՝ 2-ական:
Մրցաշարի մասնակիցները, սակայն, դժգոն են մրցաշարի անցկացման պայմաններից:
5-րդ տուրից հետո դժգոհությունն է արտահայտել Ալեքսանդր Գրիշչուկը
«Ահավոր է, չեմ ցանկանում ստեղծված իրավիճակում խաղալ: Հիմա հստակ համոզված եմ, որ մրցաշարը պետք է ընդհատվի: Մթնոլորտը թշնամական է, բոլոր մարդիկ դիմակներով են: Չեմ ուզում այստեղ լինել ու շախմատ խաղալ: Արդյո՞ք պատահական են այս օրերին բոլոր միջոցառումները դադարեցված: Մենք միակն ենք, ովքեր խաղում են: Սա ընթացքի մեջ եղած աշխարհի միակ խոշոր մրցաշարն է: Այն պետք է տեղափոխել»,- ասել է գրոսմայստերը:
Ավելի վաղ Ֆաբիան Կարուանան ասել էր, որ ջերմաչափման ժամանակ ունեցել է 37,06, ինչը խուճապ է առաջացրել մրցաշարի կազմակերպիչների մոտ:
«Բոլորը պարանոիդ վիճակում են, սրանք լավագույն պայմանները չեն խաղալու համար, սակայն ես տարբերակ չունեմ, պետք է խաղամ »,- ասել է Կարուանան:
Մրցաշարի անցկացումից դժգոհ է եղել նաև Վան Հաոն, իսկ Թեյմուր Ռաջաբովը հրաժարվել էր նման պայմաններում մրցաշարին մասնակցելուց:
