Նորություններ Subheading
տեղադրվել է 2019.09.19 10:22
Մրցաշարում Հայաստանի ներկայացուցիչները նվաճել էին 1 ոսկե, 1 արծաթե մեդալ
Շախմատի Եվրոպայի մինչև 16 տարեկանների չեմպիոն Արմեն Բարսեղյանի մարզիչ, միջազգային վարպետ Վահագն Խաչատրյանը իր սանի հաջողությունը առաջնություն համարում է ծանր աշխատանքի արդյունք:
«Եվրոպայի առաջնությանը տարիքային այս խմբում հզոր կազմ էր հավաքել: Արմենը մրցաշարի հենց մեկնարկից սկսեց գլխավորել աղյուսակը և մինչև վերջ պահեց առաջատարի դիրքերը
Առավել շատ սպասելիքներ ունեինք մինչև 18 տարեկանների մրցաշարում հանդես եկող Արամ Հակոբյանից, ով ևս մեկնարկից սկսած գլխավորում էր աղյուսակը, սակայն մրցաշարի միջնամասում պարտություն կրեց և չկարողացավ պայքարել մեդալների համար: Ընդհանուր առմամբ մեր մասնակիցների մեծ մասը հաջող հանդես եկան»,-շախմատի ակադեմիայում լրագրողների հետ հանդիպման ժամանակ ասաց մասնագետը:
Շախմատի Եվրոպայի մինչև 16 տարեկանների չեմպիոն Արմեն Բարսեղյանի կարծիքով, մրցաշարը լարված էր:
«Հետաքրքիր պայքար ծավալվեց այս տարվա առաջնությունում: Կար նաև լարվածություն: Մեր տարիքային խմբում Հայաստանի մյուս ներկայացուցիչները ևս հաջող հանդես եկան»,- շախմատի ակադեմիայում լրագրողների հետ հանդիպման ժամանակ ասաց շախմատիստը:
«Առաջնության ընթացքում ամենադժվարինը վերջին պարտիան էր, որում չեմպիոն դառնալու համար անհրաժեշտ ոչ-ոքի խաղալ: Պարտիայում վրիպում թույլ տվեցի և ծանր դրություն ունեի, սակայն համառ պաշտպանության շնորհիվ կարողացա պարտիան ավարտել հաշտությամբ»,-ասաց չեմպիոնը:
Եվրոպայի մինչև 12 տարեկանների փոխչեմպիոն Ռոբերտ Փիլիպոսյանը նշեց, որ մրցաշարի առաջին 7 տուրերում գլխավորում էր աղյուսակը, սակայն 8-րդ տուրում ցավալի պարտություն կրեց, սակայն անհատական մարզիչ Զավեն Անդրիասյանը և հավաքականի գլխավոր մարզիչ Արտաշես Մինասյանը կարողացան հոգեբանորեն պատրաստել վերջին՝ որոշիչ պարտիային, որում հաղթանակ տոնեցի, սակայն գրավեցի միայն 2-րդ հորիզոնականը:
Հանդիպման ընթացքում ներկայացվեցին նաև մոտակա մրցաշարերը՝ նշելով, որ պատանի շախմատիստները այս տարի պետք է մասնակցեն աշխարհի մինչև 16 տարեկանների Օլիմպիադային, աշխարհի պատանեկան և երիտասարդական առաջնություններին, Դվորկովիչի Գավաթի խաղարկությանը, Բոտվիննիկի հուշամրցաշարին:
