Նորություններ Subheading
տեղադրվել է 2019.08.07 05:04
Մրցաշարին մասնակցում էին Բրազիլիայի, ՌԴ-ի, Անգլիայի, ԱՄՆ, Իտալիայի, Բելառուսի և Հայաստանի թիմերը:
Օգոստոսի 6-ին ՀՀ ԱՆ «Արմավիր» քրեակատարողական հիմնարկում ավարտվեց արագ շախմատի միջազգային առաջնությունը, որն անցկացվում էր Բրազիլիայի, ՌԴ-ի, Անգլիայի, ԱՄՆ, Իտալիայի, Բելառուսի, Հայաստանի քրեակատարողական հիմնարկների ուժեղագույն շախմատիստ դատապարտյալների միջև: Հիշեցնենք, որ երեկ՝ օգոստոսի 5-ին, «Արթիկ», «Արմավիր» և «Հրազդան» քրեակատարողական հիմնարկների լավագույն խաղացող 4 դատապարտյալներից կազմված Հայաստանի թիմն առաջին փուլում իր ուժերը չափեց Ռուսաստանի Դաշնության, Բրազիլիայի և Անգլիայի դատապարտյալների հետ՝ արժանի հաղթանակ տանելով Բրազիլիայի և Անգլիայի թիմերի նկատմամբ։
Արագ շախմատի մրցաշարի եզրափակիչ փուլում հայ դատապարտյալների թիմը 3:1 հաշվով պարտվեց Իտալիայի հավաքականին, սակայն ոչ-ոքի խաղալով ԱՄՆ-ի հավաքականի հետ, 2,5-1,5 հաշվով հաղթելով Բելառուսի հավաքականին՝ առաջնությունում գրավեց 4-րդ հորիզոնականը:
Առաջին երեք հորիզոնականները համապատասխանաբար գրավեցին ՌԴ-ի, Բելառուսի և Իտալիայի թիմերը, ԱՄՆ-ի թիմը 5-րդ հորիզոնականում էր, Բրազիլիայինը՝ 6-րդ, մրցաշարային աղյուսակը եզրափակեց Անգլիայի թիմը՝ հայտնվելով 7-րդ հորիզոնականում:
Միջազգային կարգի մրցավար Նորայր Քալանթարյանը, որը մշտապես ներկա է եղել ՀՀ ԱՆ քրեակատարողական հիմնարկներում կազմակերպվող շախմատային խաղերին և նախապատրաստել հայ դատապարտյալներին միջազգային առաջնությանը, նշեց, որ մեր մարզիկները բավական պատրաստված էին, նպատակասլաց, և շախմատային նման հզոր երկրների հետ խաղում, ինչպիսիք էին մասնակից երկրները, 4-րդ հորիզոնական գրավելը խոստումնալից է և պատվաբեր:
«Մեր օգնությամբ, և այստեղ քրեակատարողական հիմնարկը տրամադրել է ժամանակ իրենց, բավարար ժամանակ՝ և՛ նախաճաշից, և՛ ճաշից հետո, որպեսզի վարժվեն մկնիկին, որովհետև մի քիչ անսովոր կարող է լինի կոմպյուտերային խաղը, քան թե, ասենք, երբ որ խաղում ես դեմ-դիմաց, ինչպես նաև շախմատային գիտելիքների առումով, որ ավելի հասուն լինեն: Այս պահին գոհ եմ, դե գիտեք՝ մեծ երկրների հետ ենք խաղում, փոքր թվով բանտարկյալներ ունենք՝ մենք գնահատվում ենք որպես ապահով երկիր, և քիչ են մեր բանտարկյալները», - ասաց Քալանթարյանը:
Մրցաշարին հետևում էր նաև Ազգային ժողովի պատգամավոր Արտակ Մանուկյանը, որը խաղի ավարտին Հայաստանի հավաքականի անդամներ Գոռ Աջամյանին, Հակոբ Աբաջյանին, Ժորա Նադարյանին և Վալերի Թումասյանին նվիրեց հայ անվանի շախմատիստ, աշխարհի կրկնակի չեմպիոն Տիգրան Պետրոսյանի հեղինակած «Գահերի խաղը» գիրքը:
«Ճիշտն ասած՝ էստեղ կարևորը ոչ թե մարզական կոմպոնենտն է, այլ՝ որ մարդիկ զգան, որ իրենք ևս աշխարհի մի մասնիկ են, այսինքն՝ փորձենք հնարավորինս ազատազրկված վայրի մասով սոցիալիզացման կամ այդ մարդկանց ևս մասնակից դարձնել ինչ-որ մի բանի ստեղծմանը», - ընդգծեց Մանուկյանը՝ հավելելով․ - «Այստեղ, կարծում եմ, հատկապես ինտերնետ տեխնոլոգիաների զարգացման հետևանքով աշխարհը դարձել է մոտ, և շատ կարևոր է, որ աշխարհը մոտ դառնա նաև ազատազրկման վայրում հայտնվածների համար»:
Պարբերաբար բանտեր այցելող պատգամավորը կարծում է, որ քրեակատարողական հիմնարկներում առաջին հերթին անհրաժեշտ է ուշադրություն դարձնել առողջապահական խնդիրներին։ Ըստ նրա՝ այս ոլորտում ավելի շատ կարիք կա ոչ թե օրենսդրության բարելավման, այլ՝ մեխանիզմների արդյունավետ կիրառման:
Քրեակատարողական հիմնարկի վարչակազմի կողմից մասնակիցները կխրախուսվեն պատվոգրերով:
Առաջնության ընթացքում տեսազանգի միջոցով մասնակից երկրների քրեակատարողական ծառայության ներկայացուցիչները հանդես եկան շնորհակալական խոսքով և հակիրճ ներկայացրին իրենց երկրների ՔԿՀ-ների շախմատային կյանքը:
