Նորություններ Subheading
տեղադրվել է 2019.07.18 01:52
Մեր շախմատիստները հաղթող ու մրցանակակիր դարձան 10 մրցաշարերում:
Հունիս և հուլիս ամիսներին հայ շախմատիստները մասնակցեցին ԱՄՆ Սենթ Լուիս և Ֆիլադելֆիա քաղաքներում կայացած մի շարք խոշոր միջազգային մրցաշարերի:
Սենթ Լուիսում 3 խմբերով՝ A, B, C, կայացան Summer Chess Classic փակ շրջանային մրցաշարերը: B մրցաշարում Հայաստանը ներկայացնում էր գրոսմայստեր Հովհաննես Գաբուզյանը, ով 10 հնարավորից վաստակեց 5 միավոր և Իգոր Կովալենկոյի հետ կիսեց 2-3-րդ հորիզոնականները: 6.5 միավորով մրցաշարի հաղթող դարձավ Գրիգորի Օպարինը: ԱՄՆ ներկայացնող Սամվել Սևյանը 4.5 միավորով կիսեց 4-6-րդ հորիզոնականները:
C մրցաշարին մասնակցում էր գրոսմայստեր Արամ Հակոբյանը, ով այս տարի ամբողջական կրթաթոշակով ընդունվել է Վեբսթերի համալսարան: Հակոբյանը 10 հնարավորից վաստակեց 6 միավոր և գրավեց 2-րդ հորիզոնականը: Մրցաշարի հաղթող դարձավ 6.5 միավոր վաստակած Արթուր Նեյսկանսը:
Մրցաշարի ավարտից անմիջապես հետո Գաբուզյանը մասնակցեց Ֆիլադելֆիա Օփեն միջազգային մրցաշարին, որտեղ մեր գրոսմայստերը 5 հնարավորից վաստակեց 4.5 միավոր և դարձավ մրցաշարի միանձնյա հաղթող:
Ֆիլադելֆիայի Օփենին զւոգահեռ նույն օրերին կայացավ նաև Ֆիլադելֆիա Ինթենեյշնլ միջազգային մրցաշարը, որին մասնակցում էր գրոսմայստեր Զավեն Անդրիասյանը: Մեր շախմատիստը 9 հնարավորից վաստակեց 6.5 միավոր և կիսեց 2-9-րդ հորիզոնականները, իսկ մրցաշարի հաղթող դարձավ 7 միավոր վաստակած Ալեքսանդր Լենդերմանը:
Այս մրցաշարերի ավարտից հետո Ֆիլադելֆիայում կայացավ Ուորլդ Օփեն միջազգային մրցաշարը, որին մասնակցեցին գրոսմայստերներ Հրանտ Մելքումյանը, Հովհաննես Գաբուզյանը, Արման Փաշիկյանը, Զավեն Անդրիասյանը և Արամ Հակոբյանը: Ուորլդ Օփենի հաղթող դարձավ Լե Քուան Լիեմը, ով 9 հնարավորից վաստակեց 7.5 միավոր: Նույնքան միավոր վաստակած Ջեֆֆրի Սյունը զբաղեցրեց 2-րդ հորիզոնականը: Մեր ներկայացուցիչներից Հրանտ Մելքումյանը և Զավեն Անդրիասյանը 7-ական միավորով կիսեցին 3-7-րդ հորիզոնականները: Արման Փաշիկյանը 6.5 միավորով 8-15-րդ հորիզոնականները: Հովհաննես Գաբուզյանը վաստակեց 6, իսկ Արամ Հակոբյանը 5.5 միավոր:
Ուորլդ Օփենի շրջանականերում անցկացվում էին տարբեր ենթախմբերով մի շարք այլ մրցաշարեր ևս: Մասնավորապես Ուորլդ օփենի Unrated ենթախմբում շախմատի ֆեդերացիայի գլխավոր քարտուղար Միքայել Անդրիասյանը 9 հնարավորից վաստակեց 8 միավոր և գրավեց 2-րդ հորիզոնականը:
Մինչև 13 տարեկան աղջիկների ենթախմբում ԱՄՆ ներկայացնող Լորել Արոնյանը 4.5 միավորով բաժանեց 2-5-րդ հորիզոնականները:
Ուորլդ Օփենի շրջանակներում անցկացվեցին նաև արագ և կայծակնային շախմատի մի շարք մրցաշարեր, որոնցում հաջողությամբ հանդես եկան Զավեն Անդրիասյանը և Հովհաննես Գաբուզյանը:
Ուորլդ Օփենի կայծակնային մրցաշարում (5 րոպե պարտիայի համար)Զավեն Անդրիասյանը 10 հնարավորից վաստակեց 8 միավոր և գրոսմայստեր Էմիլիո Կորդոբայի հետ կիսեց 1-2-րդ հորիզոնականները:
Ուորլդ Օփենի արագ շախմատի մրցաշարում (10 րոպե պարտիայի համար) Հովհաննես Գաբուզյանը 5 հնարավորից վաստակեց 5 միավոր և դարձավ մրցաշարի միանձնյա հաղթող:
Ուորլդ Օփենի մեկ այլ կայծակնային մրցաշարում, որում կողմերին պարտիայի համար տրվում էր 7-ական րոպե Զավեն Անդրիասյանը և Հովհաննես Գաբուզյանը 10 հնարավորից վաստակեցին 8-ական միավոր և կիսեցին 2-3-րդ հորիզոնականները, իսկ մրցաշարի հաղթող դարձավ 9 միավոր վաստակած Ղաեմ Մաղամին:
Արագ շախմատի մեկ այլ մրցաշարում, որում պարտիայի համար տրվում էր 25 րոպե Հովհաննես Գաբուզյանը 5 հնարավորից վաստակեց 4.5 միավոր և Ղաեմ Մաղամիի հետ կիսեց 1-ին հորիզոնականը:
