Նորություններ Subheading
տեղադրվել է 2019.06.17 05:18
Գիրքը Պետրոսյանի հոբելյանի կապակցությամբ յուրօրինակ նվեր է բոլոր շախմատասերների և հայ հանրության համար:
ՀՀ 3-րդ նախագահ, Հայաստանի շախմատի ֆեդերացիայի նախագահ Սերժ Սարգսյանն այսօր Տիգրան Պետրոսյանի անվան շախմատի տանը մասնակցել է շախմատի աշխարհի 9-րդ չեմպիոն Տիգրան Պետրոսյանի ծննդյան 90-ամյակի առիթով լույս ընծայված` աշխարհահռչակ շախմատիստի «Գահերի խաղը. Ինչպես հաղթել շախմատում» գրքի շնորհանդեսին:
Գիրքը հրատարակվել է Հայաստանի շախմատի ֆեդերացիայի օժանդակությամբ` հայազգի տաղանդավոր զավակի հոբելյանի կապակցությամբ յուրօրինակ նվեր դառնալով բոլոր շախմատասերների և տասնամյակներ շարունակ նրանով հպարտացող հայ հանրության համար: Գրքի հայերեն թարգմանությունը և հրատարակությունն իրականացրել է «Նյու Մեգ» ընկերությունը:
Միջոցառմանը մասնակցել են շախմատի ֆեդերացիայի անդամներ, գրոսմայստերներ, միջազգային վարպետներ, շախմատի տանն անցկացվող` Տիգրան Պետրոսյանի ծննդյան օրվան նվիրված կայծակնային հուշամրցաշարի մասնակիցները:
Գրքում հավաքված են աշխարհի չեմպիոնի կարևոր հոդվածները, պարտիաների մեկնաբանությունները, քայլերի համակարգումը, դասախոսությունները: Լեգենդար շախմատիստի 14 դասերն ընդգրկում են շախմատային պարտիայի բոլոր փուլերը: Գրքի վրա Տիգրան Պետրոսյանը սկսել է աշխատել 1980-ականների սկզբին, բայց այդպես էլ չի ավարտել այն: Նրա մահից հետո ամփոփ տեսքի է բերել շախմատիստի այրին` Ռոնա Պետրոսյանը: Գիրքը կազմելիս օգտագործվել են Պետրոսյանի դասախոսությունները, որոնք նվիրված են շախմատային ռազմավարական նրբություններին, ռեպորտաժներ, հեռուստատեսային և ռադիոձայնագրություններ, շաբաթաթերթերում հրատարակված հոդվածներ: Անվանի շախմատիստի ուսուցողական լավագույն նյութերը, գիրքը հրատարակողների համոզմամբ, այն դարձնում են ինքնակատարելագործման հիանալի ձեռնարկ:
«Հայ ժողովուրդն իր պատմության ընթացքում ծնել է բազմաթիվ շնորհաշատ զավակներ, ովքեր իրենց լուրջ ներդրումն են ունեցել մեր ժողովրդի զարգացման գործում: Նրանցից մեկը, անկասկած, Տիգրան Պետրոսյանն է, ով մնացածներից նաև տարբերվեց նրանով, որ իր տաղանդի դրսևորմամբ իրավիճակ փոխեց Հայաստանում: Լինելով միակ հայ գրոսմայստերը` նրա շնորհիվ ընդամենը մի քանի տասնամյակ հետո Հայաստանի շախմատի ֆեդերացիան այսօր Հայաստանում միավորում է 43 գրոյսմայստերի: Եթե հետաքրքրասերները փորձեն համեմատել, թե աշխարհում որքան գրոսմայստեր կա, և նրանցից որքանն են գործում Հայաստանի շախմատի ֆեդերացիայի դրոշի ներքո, ապա հասկանալի կլինի, որ իր գործունեությամբ, իրոք, Տիգրան Պետրոսյանը իրավիճակ փոխեց Հայաստանում: Եվ ոչ միայն շախմատում, որովհետև այն հարյուր հազարավորները, որ Հայաստանում շախմատ են խաղում, կյանքին վերաբերվում են մի քիչ այլ կերպ, քան նրանք, ովքեր շախմատ չեն խաղում: Բայց այսօրվա այս համեստ միջոցառումը, իմ կարծիքով, մեկ այլ խորհուրդ էլ ունի. մեր ժողովուրդը մշտապես տեսել է աշխարհում առաջավորը, այն ընկալել է, տեղայնացրել, սեփական երանգներն է հաղորդել, և նաև դրա շնորհիվ է, որ մենք հարատևում ենք այս չափազանց բարդ տարածաշրջանում: Այդ գործն առաջ է ընթացել նաև թարգմանիչների ու բոլոր այն մարդկանց օգնությամբ, ովքեր գիտելիքը տարածել են գրքի միջոցով: Շնորհակալ եմ, իհարկե, թարգմանչին, շնորհակալ եմ բոլոր նրանց, ովքեր այսօր մեզ ուրախացրին Տիգրան Պետրոսյանի այս հոյակապ գիրքը մեզ ու հարյուր հազարավորներին նվիրելով»,-գրքի շնորհանդեսի ժամանակ ասել է ՀՀ 3-րդ նախագահ, Հայաստանի շախմատի ֆեդերացիայի նախագահ Սերժ Սարգսյանը:
ՀՀ 3-րդ նախագահը Տիգրան Պետրոսյանի հոբելյանի կապակցությամբ ծաղիկներ է դրել շախմատի տան բակում գտնվող նրա կիսանդրուն և հարգանքի տուրք մատուցել անվանի շախմատիստի հիշատակին:
