Նորություններ Subheading
տեղադրվել է 2019.04.04 11:17
Ենթախմբի եզրափակչում թիմը հաղթեց Թբիլիսիի ակումբին:
Երեկ տեղի ունեցան Chess.com խոշորագույն շախմատային կայքի կազմակերպած PRO Chess League մրցաշարի ենթախմբային փուլերի եզրափակիչները: Մրցաշարին մասնակցող թիմերը՝ըստ աշխարհագրական դիրքի, բաժանված էին 4 ենթախմբերի՝ Արևելյան, Կենտրոնական, Ատլանտյան և Խաղաղօվկիանոսյան: Հայաստանը ներկայաղնող Armenian Eagles (Հայկական արծիվներ) թիմն ընդգրկված էր Արևելյան ենթախմբում:
Ենթախմբի 8 թիմերը միմյանց միջև անցկացրել էին շրջանային մրցաշար, որի արդյունքում 1-4-րդ հորիզոնականները զբաղեցրած թիմերը իրավունք էին ստացել շարունակելու պայքարը: Շրաջանային մրցաշարում մեր թիմը 236.5 միավորով զբաղեցրել էր երկրորդ հորիզոնականը: Ենթախմբի կիսաեզրափակչում Armenian Eagles –ը առավելության էր հասել Հնդկաստանը ներկայացնող Mumbai Movers ակումբի նկատմամբ, որի կազմում հանդես էին գալիս հանրահայտ գրոսմայստերներ Ադհիբանը և Վիդիթ Գուջրաթին: Եզրափակչում մեր թիմի մրցակիցն էր Tbilisi Gentlemen ակումբը:
Ենթախմբի եզրափակչում Armenian Eagles թիմը մեծ առավելությամբ հաղթանակի հասավ Թբիլիսին ներկայցնող թիմի նկատմամբ:
Մեր թիմը հանդես էր գալիս հետևյալ կազմով՝ Զավեն Անդրիասյան, Հայկ Մարտիրոսյան, Շանթ Սարգսյան և Աննա Սարգսյան: Թիմի ավագն է ԱԺ պատգամավոր, ԱԺ ֆինանսավարկային եւ բյուջետային հարցերի մշտական հանձնաժողովի նախագահի տեղակալ Արտակ Մանուկյանը:
Երեկ հայտնի դարձան նաև մյուս ենթախմբերի հաղթողները:
Կենտրոսնական ենթախմբում հաղթանակ տոնեց Baden-Baden Snowballs թիմը:
Ատլանտյան ենթախմբում հաղթանակն ուղեկցեց Սենթ Լուիսի թիմին, որի կազմում հանդես են գալիս Ֆաբիանո Կարուանան և Ուեսլի Սոն: Նշենք, որ Սենթ Լուիսի թիմից հանդես էր գալիս ԱՄՆ ներկայացնող մեր հայրենակից Վարուժան Հակոբյանը:
Խաղաղօվկիանոսյան ենթախմբում հաղթող ճանաչվեց Chengdu Pandas հզոր չինական ակումբը, որի կազմում հանդես են գալիս Չինաստանի հավաքականի բոլոր առաջատարները ՝Դին Լիժենը, Յու Յանգին, Վան Յուն և Լի Չաոն:
Այս 4 թիմերը կվիճարկեն Pro Chess League –ի հաղթողի կոչումը, սակայն, ի տարբերություն մյուս բոլոր փուլերի, որոնք անցկացվում են համացանցի միջոցով, եզրափակիչը տեղի կունենա Սան Ֆրանցիսկո քաղաքում: Մրցաշարը կանցկացվի մայիսի 4-ին և 5-ին:
Հիշեցնենք, որ Armenia Eagles թիմը հանդիսանում է PRO Chess լիգայի գործող հաղթողը և կմեկնի Սան Ֆրանցիսկո պաշտպանելու իր տիտղոսը:
