Նորություններ Subheading
տեղադրվել է 2018.09.28 09:37
Տղամարդկանց հավաքականը պարտվեց Ադրբեջանին:
Բաթումում ընթացող շախմատի Համաշխարհային Օլիմպիադայի 5-րդ տուրում Հայաստանի կանանց հավաքականի մրցակիցն էր գործող չեմպիոն Չինաստանի ընտրանին, որը գլխավորում է կանանց աշխարհի չեմպիոն Ցզյու Վենցզյունը: Մրցախաղն ընթացավ լարված պայքարում և ավարտվեց ոչ-ոքի հաշվով: Առաջին խաղատախտակի վրա Էլինա Դանիելյանը ոչ-ոքի խաղաց աշխարհի կանանց չեմպիոնի հետ, երկրորդ խաղատախտակի վրա հանդես եկող Լիլիթ Մկրտչյանը հաղթեց Շեն Յանին, Աննա Սարգսյանը ոչ-ոքի խաղաց Հուան Ցիանի հետ, իսկ Մարիա Կուրսովան, ցավոք, պարտություն կրեց: Կանանց պայքարում 5-րդ տուրից հետո ԱՄՆ կանանց հավաքականը 10 միավորով սկսեց միանձնյա գլխավորել աղյուսակը: 6 հավաքական՝ Հայաստանը, Չինաստանը, Ուկրաինան, Հնդկաստանը և Վրաստանի առաջին և երկրորդ թիմերը 9-ական միավորով կիսում են 2-7-րդ հորիզոնականները: Վաղը մրցաշարում հանգստյան օր է, իսկ սեպտեմբերի 30-ին կայանալիք 6-րդ տուրում մեր մրցակիցն է լինելու մրցաշարում ամենաբարձր միջին գործակից ունեցող Ռուսաստանի թիմը:
Տղամարդկանց մրցաշարի 5-րդ տուրը անհաջող ստացվեց մեր թիմի համար: Հայաստանի հավաքականը ցավալի պարտություն կրեց Ադրբեջանի թիմից: Մրցախաղում առաջինն ավարտվեց Հրանտ Մելքումյան - Արկադի Նայդիչ պարտիան: Սպիտակներով հանդես եկող Մելքումյանը ուժեղ գտնվեց մրցակցից: Շոշափելի առավելություն ուներ նաև մեր թիմի առաջատար Լևոն Արոնյանը, սակայն մեր շախմատիստը թույլ տվեց մի շարք սխալներ և պարտվեց Մամեդյարովին: Պարտություն կրեց նաև Գաբրիել Սարգսյանը, իսկ Հայկ Մարտիրոսյանն իր պարտիան ավարտեց ոչ-ոքի արդյունքով:
5-րդ տուրից հետո աղյուսակը 10-ական միավորով գլխավորում են Չեխիայի, Ադրբեջանի,Լեհաստանի և Ուկրաինայի թիմերը: Հայաստանի հավաքականը 8 թիմային միավորով կիսում է 8-24-րդ հորիզոնականները: Սեպտեմբերի 30-ին կայանալիք 6-րդ տուրում մեր մրցակիցն է լինելու Մակեդոնիայի թիմը:
