Նորություններ Subheading
տեղադրվել է 2018.06.12 01:26
4-րդ տուրում «Chessify»-ը 6-0 հաշվով հաղթեց Ակադեմիայի թիմին
Տիգրան Պետրոսյանի անվան շախմատի տանը շարունակվող Հայաստանի ակումբային առաջնությունում կայացավ 4-րդ տուրը: Մրցաշարի միանձնյա առաջատար և ֆավորիտ «Chessify» ակումբը 6-0 հաշվով պարտության մատնեց Հայաստանի շախմատի ակադեմիայի թիմին: «Էջմիածին Լոգիկոն» ակումբը 5-1 հաշվով վստահ հաղթանակ տոնեց Քանաքեռ-Զեյթունի թիմի նկատմամբ: Գրոսմայստերական դպրոցի թիմը 5-1 հաշվով հաղթեց Հենրիկ Գասպարյանի անվան շախմատի Օլիմպիական մարզադպրոցի երկրորդ թիմին: 4-րդ տուրի մրցախաղերից որոշ չափով համառ պայքար ընթացավ միայն «Երևան»-ի և «Հենրիկ Գասպարյանի անվան շախմատի Օլիմպիական մարզադպրոց» թիմերի մրցամարտը: Առաջին, երկրորդ և վեցերորդ խաղատախտկների վրա գրանցվեց հաշտություն: Մնացած խաղատախտակների վրա ընթանում էր հավասար պայքար և կողմերից յուրաքանչյուըը կարող էր հաղթել: Սակայն, հիմնականում վետերան շախմատիստներով համալրված «Երևան» թիմի խաղացողները չդիմացան լարվածությունը և երեք պարտիաներում հաղթանակը ուղեկցեց «Հենրիկ Գասպարյանի անվան շախմատի Օլիմպիական մարզադպրոց»-ը ներկայացնող պատանի շախմատիսներին:
4-րդ տուրից հետո աղյուսակը վստահորեն գլխավորում է «Chessify» ակումբը, որը վաստակել է 8 թիմային միավոր: Հենրիկ Գասպարյանի անվան շախմատի Օլիմպիական մարզադպրոցի առաջին թիմը և Գրոսմայստերական դպրոցը վաստակել են 6-ական միավոր և կիսում են 2-3-րդ հորիզոնականները:
