Նորություններ Subheading

Հանգստյան օրերին Տիգրան Պետրոսյանի անվան շախմատի տանը տեղի ունեցան Հայաստանի շախմատի ակումբային առաջնության 2-րդ և 3-րդ տուրերի պարտիաները: 2-րդ տուրի կենտրոնական մրցախաղում «Chessify» ակումբը մրցում էր «Երևան»-ի դեմ: Մրցախաղը կարելի էր անվանել նաև սերունդների մրցախաղ, քանի «Chessify» կազմում հանդես են գալիս Հայաստանի վերջին 4 տարիների չեմպիոնները՝ Հայկ Մարտիրոսյանը, Հովհաննես Գաբուզյանը, Զավեն Անդրիասյանը, Կարեն Գրիգորյանը, երիտասարդ գրոսմայստեր Սամվել Տեր-Սահակյանը, իսկ «Երևան»-ի կազմում հանդես են գալիս վետերան շախմատաիստները՝ հայկական շախմատի լեգենդ Ռաֆայել Վահանյանը, կրկնակի Օլիմպիական չեմպիոն Արտաշես Մինասյանը, Հայաստանի հավաքականի նախկին անդամ Նորայր Քալանթարյանը: Մրցախաղն անցավ «Chessify»-ի առավելությամբ՝ նրանց սպիտակ խաղաքարերով շախմատիստները՝ Զավեն Անդրիասյանը, Հովհաննես Գաբուզյանը և Արմենակ Եղիազարյանը, հաղթանակներ տոնեցին, իսկ սև խաղաքարերով հանդես եկողները՝ Հայկ Մարտիրոսյանը, Սամվել Տեր-Սահակյանը և Գևորգ Հարությունյանն իրենց պարտիաներն ավարտեցին հաշտությամբ: Այսպիսով մրցախաղն ավարտվեց «Chessify»-ի հաղթանակով: Մեր ընթերցոներին հետաքրքիր կլինի իմանալ նաև, թե ինչ է նշանակում «Chessify» անվանումը:

 Chessify սթարթափ է, որի նպատակն է տեխնոլոգիական նորագույն զարգացումները հասանելի դարձնել շախմատային աշխարհին: Այս նպատակով, ընկերությունը ստեղծել է համանուն մոբայլ հավելված, որի գլխավոր հնարավորություններից են.

• գրքերից կամ էկրանից շախմատային դիրքերի սկանավորումը եւ դրանց վերլուծումը
• գլխավոր մրցաշարերի ուղիղ ցուցադրումը
• դժվարության տարբեր մակարդակներ ունեցող համակարգչի հետ խաղալը:

Բացի հեռախոսային հավելվածից, Chessify-ը պրոֆեսիոնալ շախմատիստներին տրամադրում է ամպային ծառայություն, որը միջինում 20 անգամ արագացնում է Stockfish 9 շախմատային գործիքի աշխատանքը: Փլագինը կարելի է ներբեռնել Chessify-ի պաշտոնական կայքից ` chessify.me:

«Էջմիածին Լոգիկոն» ակումբը կարևոր հաղթանակ տոնեց  Գրոսմայստերական դպրոցի նկատմամբ, որի կազմում բացակայում էր թիմի առաջատար Արման Փաշիկյանը:  Հենրիկ Գասպարյանի անվան շախմատի Օլիմպիական մարզադպրոցի թիմը հաղթանակ տոնեց Քանաքեռ-Զեյթունի նկատմամբ. թիմի կազմում 2.5-2.5 հաշվի ժամանակ վճռորոշ հաղթանակը տոնեց թիմի առաջատար, երիտասարդ գրոսմայստեր Արամ Հակոբյանը: Հայաստանի շախմատի ակադեմիայի թիմը 6-0 հաշվով հաղթեց  Հենրիկ Գասպարյանի անվան շախմատի Օլիմպիական մարզադպրոցի երկրորդ թիմին:

Երեկ կայացած 3-րդ տուրի կենտրոնական մրցախաղում  Հենրիկ Գասպարյանի անվան շախմատի Օլիմպիական մարզադպրոցի թիմը լարված պայքարում առավելության հասավ «Էջմիածին Լոգիկոն»-ի նկատմամբ, իսկ Գրոսմայստերական դպրոցը 4-2 հաղթեց «Երևան»-ի թիմին: Մրցաշարի միանձնյա առաջատար «Chessify»-ը 5.5-0.5 հաշվով պարտության մատնեց Հենրիկ Գասպարյանի անվան շախմատի Օլիմպիական մարզադպրոցի երկրորդ թիմին:  Մրցաշարում գրանցվեց նաև առաջին ոչ-ոքին՝ Հայաստանի շախմատի ակադեմիան միավորը կիսեց Քանաքեռ-Զեյթունի ակումբի հետ:

Խաղացված 3 տուրերից հետո մրցաշարային աղյուսակը միանձնյա գլխավորում է «Chessify» ակումբը, որը վաստակել է 6 թիմային միավոր: Հենրիկ Գասպարյանի անվան շախմատի Օլիմպիական մարզադպրոցի և Գրոսմայստերակն դպրոցի թիմերը 4-ական միավոր կիսում են 2-3-րդ հորիզոնականները:

Մրցաշարային աղյուսակ