Նորություններ Subheading
տեղադրվել է 2018.05.26 06:20
Սուրեն Բաղդասարյանը Չեսս Պրեսս թիմի կազմում մասնակցում է Հայաստանի շախմատի ակումբային առաջնությանը
Հարցազրույց ֆուտբոլային մեկնաբան, Ֆուտբոլ + շաբաթաթերթի գլխավոր խմբագիր Սուրեն Բաղդասարյանի հետ:
Պրն. Բաղդասարյան մեկնարկել է Հայաստանի շախմատի ակումբային առաջնությունը, ինչպիսի՞ն են Ձեր տպավորությունները:
Շատ ուրախալի է նման միջոցառման անցկացումը և հատկապես կարևորում եմ, որ բոլոր տարիքային խմբերի երեխաներ են մասնակցում: Նրանց համար սա թրծվելու շատ լավ առիթ է: Մրցաշարը բաց է նաև սիրողական մակարդակով խաղացողների համար, ովքեր միայն հաճույք են ստանում այս մրցաշարին մասնակցելով, փորձում են իրենց ուժերը, կարողանում են գնահատել իրենց մակարդակը: Շախմատի մասսայականացման համար իսկապես կարևոր մրցաշար է: Ակումբային առաջնությունն ընգրգկում է լայն շերտեր, որն առանցքային է շախմատի զարգացման համար: Իհարկե, մենք բարձրակարգ պրոֆեսիոնալներ ունենք, մենք շախմատային երկիր ենք, բայց այդ մակարդակը միջազգային ասպարեզում պահպանելու համար անհրաժեշտ է հզոր ռեզերվ: Ֆուտբոլը ավելի մասսայական է քան շախմատը, բայց Հայաստանում շախմատի հիմքը շատ լավ է դրված ու ես անկեղծորեն շատ ուրախ եմ այս փաստով: Ինքս շախմատի ֆանատ եմ և եթե ֆուտբոլային մեկնաբան չդառնայի, պրոֆեսիոնալ շախմատիստ կլինեի:
Հետևու՞մ եք արդյոք ընթացիկ շախմատային մրցաշարերին մրցաշարերին:
Ես որևէ սուպերմրցաշար բաց չեմ թողնում: Իմ ամբողջ ազատ ժամանակը նվիրում եմ շախմատին, բոլոր պարտիաներին հետևում եմ և գերագույն հաճույք եմ ստանում: Ուղիղ հեռարձակմամբ պարտիաները դիտելիս՝ փորձում ես քայլերը կռահել, ստուգում ես քո գիտելիքները:
Դուք ևս մասնակցում եք մրցաշարին, Ձեզ դուր գալիս մրցաշարի արագ շախմատի ձևաչափը:
Ես հետևում եմ շախմատային մամուլին և կարծում եմ, որ ապագան արագ շախմատինն է: Աշխարհի առաջնությունները, իհարկե, պետք է պահպանվեն, բայց այժմ մարդիկ չեն սիրում երկար նստել, դիտել մեկ պարտիա: Խնդիր կա նաև հովանավորներ գտնելու: Արագ շախմատը ինձ համար լավագույն տարբերակն է: 25 րոպեն լավ տարբերակ է, հնարավորություն ունես նաև որոշ դեպքերում ավելի խորը մտածել:
Ի՞նչպես առաջացավ մրցաշարին մասնակցելու գաղափարը:
Դեռևս ԽՍՀՄ տարիներին ամեն տարի անցկացվում էր լրագրողների հանրապետական առաջնություն: Ես չեմպիոն եմ դարձել այդ ժամանակ: Այս տարի անցկացվեց լրագրողների Հայաստանի առաջնություն, ես գրավեցի 2-րդ հորիզոնականը և մեզ մոտ միտք առաջացավ կազմավորելու լրագրողների թիմ: Աշխատանքներ են տարվում նաև Արցախում կազմակերպել լրագրողների շախմատի միջազգային մրցաշար: Մեր թիմի անդամները սիրողական մակարդակի բավականին լավ շախմատ են խաղում, սակայն շատ դժվար է մրցակցել երեխաների հետ, ովքեր 20-30 քայլ տեսություն գիտեն: Թիմը կազմավորելիս առաջնորդվել ենք լրագրողների առաջնության արդյունքներով:
Ֆուտբոլում, ինչպես նաև որոշ երկրների շախմատի առաջնություններն անցկացվում են ամբողջ տարվա ընթացքում, եթե Հայաստանում ևս ակումբային առաջնությունն անցկացվի ամբողջ տարվա ընթացքում, շաբաթ և կիրակի օրերին, ոչ պրոֆեսիոնալ շախմատիստները կկարողանան ժամանակ գտնել և մասնակցել լիգային:
Իհարկե շատ լավ կլինի, որ շատ թիմեր լինեն, լինի լիգա, նույն Գերմանիայի առաջնությունում, առաջատար շախմատիստները չեն մասնակցում բոլոր խաղերին, մասնակցում են շատ քիչ թվով խաղերի: Եթե Հայաստանում նման լիգա ստեղծվի և անհրաժեշտ լինի 4 խաղացողով հանդես, մեր լրագրողների թիմում կընդգրկենք 15-20 հոգի և ով ազատ լինի հանդես կգա հերթական տուրում և միմյանց փոխարինելով կխաղանք:
