Նորություններ Subheading

Խաղափուլի ավարտին մրցաշարի մեկնաբաններից Պետեր Լեկոն զարմացավ, երբ Յան Գուստաֆսոնը արձանագրեց, որ բոլոր պարտիաներն ավարտվել են հաշտությամբ. 5-րդ տուրի պարտիաներն իրենց բովանդակությամբ այնքան հետաքրքիր էին, որ Լեկոյի համար դժվար էր հավատալ, որ ոչ մի հաղթական արդյունք չի գրանցվել: Գեորգ Մեյերը և Արկադի Նայդիչը դեռ երկար կհիշեն այս օրը, քանի որ երկուսն էլ ունեին հաղթական դրություններ համապատասխանաբոր Մագնուս Կարլսենի և Մաթիաս Բլյուբաումի նկատմամբ: Սկզբում, կանդրադառնանք մյուս երեք պարտիաներին:

Մաքսիմ Վաշիե-Լագրավը ջրի արտացոլանքի մեջ:

Առաջինն ավարտվեց Լևոն Արոնյանի պարտիան ընդդեմ մրցաշարի համաառաջատար Մաքսիմ Վաշիե-Լագրավի հետ: Պարտիայի մեկնաբանների կարծիքով Արոնյանը չէր նկատել Լագրավի հետաքրքիր 19. Ձxe6 քայլը, իսկ հետխաղյա հարցազրույցի ընթացքում հայկական շախմատի առաջատարը նշեց, որ պարզապես թերագնահատել էր այն: Արոնյանի կարծիքով, Լագրավը կարող էր ավելի լավ խաղալ 26-րդ քայլում կատարելով 26.Ահ2 քայլը, բայց նույնիսկ այդ դեպքում ինքը կկարողանար պահպանել դիրքի հավասարություն:

Չնայած Արոնյանը թերագնահատեց 19. Ձxe6 քայլը՝ պարտիան ավարտվեց հաշտությամբ:

Կարճ պայքարից հետո ոչ-ոքի գրանցվեց նաև Հոու Յիֆան – Վիտյուգով պարտիայում: Յիֆանը հետագայում մեկնաբանեց, որ 12. d5 քայլը խաղալով, հույս ուներ ստանալու թեթև առավելություն, սակայն չկարողացավ միաժամանակ վերահսկել նաև թագուհու թևը:

Ուժեղագույն կին շախմատիստուհու մեկնաբանությունները կարող եք դիտել այստեղ:

Մեկնարկային երկու հաղթանակներից հետո, Վիտյուգովը 3-րդ անընդմեջ ոչ-ոքին խաղաց

Անանդի 1.e4 քայլին Կարուանան կիրառեց Կարո-Կանի պաշտպանություն, ինչը նրա հիմնական խաղացանկի մեջ ներառված չէ և, ըստ մեկնաբանների, Կարուանան սկզբնախաղում ստացավ փոքր-ինչ վատ դիրք:  Ինչևէ, բարդ միջնախաղում երկու շախմատիստն էլ խաղացին շատ ճիշտ, իսկ խաղատախտակին կատարվեցին մի շարք փոխանակումներ և 41-րդ քայլում կողմերը հաշտություն կնքեցին:

Անանդ – Կարուանա՝ ոչ-ոքի. հազվադեպ հանդիպող արդյունք այս երկու շախմատիստների դիմակայություններում

Իսկ այժմ հերթն է քննարկելու տուրի երկու հետաքրքիր ընթացք ունեցած պարտիաները, որոնք Մեյերը և Նայդիչը դեռ երկար կհիշեն:  Սկսենք Մեյերի պարտիայից, որում նա կարող էր հաղթել աշխարհի չեմպիոն Մագնուս Կարլսենին: Երկկողմանի ցայտնոտում Կարլսենը կոպիտ սխալ թույլ տվեց՝ կատարելով 37. Թxa7 քայլը: Պատասխան քայլով Մեյերը կատարեց հաղթանակի տանող միակ քայլը՝ 38. Փg4, սակայն հաջորդ իսկ քայլում, ունենալով շատ քիչ ժամանակ, Մեյերը կատարեց 39. Նa1 քայլը, որը անմիջապես պարտիան հանգեցրեց ոչ-ոքիի: Պարտիայից հետո Մեյերը նշեց, որ թե՛ ինքը, թե՛ Կարլսենը 39.Նh1! Թe7 40.Նxh7 Աxh7 41.Նh5+ Աg6 քայլերից հետո չէին նկատել փայլուն 42.Նh6!! քայլը, որից հետո մատից խուսափել հնարավոր չէ: Կարլսենը իր հերթին մեկնաբանեց. «Ես դեռ հնարավորություն ունեմ հաղթելու մրցաշարը: Իհարկե մինչ այս ելույթներս փայլուն չեն, սակայն երբեք ուշ չէ սկսել լավ խաղ ցուցադրել»:

Մեյերը շատ մոտ էր հաղթանակին

Արկադի Նայդիչր ևս շատ մոտ էր մրցաշարում առաջին հաղթանակ տանելուն: Բլյուբաումի հետ պարտիայում Նայդիչը պարտիայի հենց մեկնարկից ծավալեց հզոր գրոհ և ստացավ մեծ առավելություն: Սպիտակներով հանդես եկող Նայդիչը ուներ հաղթանակի տանող մի շարք հնարավորություններ, սակայն նա որոշեց կատարել նավակի գեղեցիկ զոհաբերություն, սակայն սևերը հրաշքով խուսափեցին մատից, իսկ ստացված վերջնախաղը այդքան էլ հեշտ չէր հաղթել: Արդյունքում Նայդիչը խաղաց 40 քայլ ևս, որիկց հետո կնքվեց հաշտություն: 

Նայդիչը բաց թողեց Բլյուբաումին գեղեցիկ ոճով հաղթելու հիանալի հնարավորությունը: 

5-րդ տուրի ոչ-ոքիներց հետո մրցաշարային աղյուսակում ոչինչ չփոխվեց:

Մրցաշարի վերաբերյալ ամբողջական տեղեկատվությանը կարող եք ծանոթանալ մրցաշարի էջում: