Նորություններ Subheading

Սան Ֆրանցիսկոյում ապրիլի 7-ին և 8-ին տեղի ունեցան Pro Chess League ակումբային մրցաշարի կիսաեզրափակիչները և եզրափակիչը:

Ինչպես տեղեկացրել էինք, Հայկական արծիվներ (Armenia Eagles) դարձել էր Արևելյան ենթախմբի հաղթող և իրավունք ստացել վիճարկելու մրցաշարի հաղթողի կոչումը:

Մասնակից թիմերը

Թիմի կազմում Սան Ֆրանցիսկո էին մեկնել ՄԳ Զավեն Անդրիասյան (1-ին խաղատախտակ), ՄԳ Սամվել Տեր-Սահակյանը (2-րդ խաղատախտակ), ՄԳ Կարեն Գրիգորյանը (3-րդ խաղատախտակ) և ազգային վարպետ Արտակ Մանուկյանը (4-րդ խաղատախտակ): Նշենք, որ Pro Chess League –ի կանոնների համաձայն՝ թիմի 4 խաղացողների միջին գործակիցը չպետք է գերազանցի 2500 կետը:Նշենք, որ թիմի կազմում մրցաշրջանի ընթացքում բացի վերը նշված մասնակիցներից հանդես են եկել և ընդհանուր հաղթանակին մեծապես նպաստել են Հրանտ Մելքումյանը և Մանուէլ Պետրոսյանը:

Ձախից աջ՝ Սամվել Տեր-Սահակյան, Արտակ Մանուկյան, Զավեն Անդրիասյան, Կարեն Գրիգորյան

Կիսաեզրափակչում մեր մրցակիցներն էր Pro Chess League գործող չեմպիոն Սենթ Լուիսի ակումբը, որի կազմում մշտապես հանդես է գալիս Ֆաբիանո Կարուանան, սակայն վճռորոշ այս փուլում նա բացակայում էր GRENKE Chess Classic մրցաշարի մասնակցության պատճառով: Կարուանայի բացակայության պայմաններում թիմը գլխավորում էր ԱՄՆ ներկայացնող մեր հայրենակից Վարուժան Հակոբյանը: Բացի Հակոբյանից թիմի կազմում հանդես էին գրոսմայստերներ Դարիուշ Սվերչը, Յարոսլավ Ժերեբուխը և ազգային վարպետ Ֆորեստ Չենը:

Կիսաեզրափակիչն անցավ լարված և հավասար պայքարում: 7.5 - 7.5 հաշվի ժամանակ մեր թիմին հաղթական միավորը բերեց Սամվել Տեր-Սահակյանը:

Սամվել Տեր-Սահակյանի հաղթանակի շնորհիվ թիմը դուրս եկավ եզրափակիչ:

Երկրորդ կիսաեզրափակչում Չինաստանը ներկայացնող Chengdu Pandas ակումբը հեշտորեն հաղթանակ տոնեց Ljubljana Turtles թիմի նկատմամբ:

Չինաստանը ներկայացնող թիմի կազմում հանդես էին գալիս Օլիմպիական չեմպիոններ Վան Յուն և Նի Հուան, ինչպես նաև պատանի գրոսմայստեր Սյու Սյանյուն և պատանի շախմատիստուհի Չուո Ռուտոնը:

Ձախից աջ՝ Նի Հուա, Վան Յու և Սյու Սյանյու

Այսպիսով եզրափակչում միմյանց դեմ մրցեցին Armenia Eagles և Chengdu Pandas ակումբները:

Անչափ լարված և հետաքրքիր պայքարում անցած եզրափակիչն ավարտվեց 8-8 հաշվով:

Հաղթողին որոշելու համար նշանակվեցին լրացուցիչ պարտիաներ, որում յուրաքանչյուրին կողմին տրվում է 3 րոպե պարտիայի համար, 1 վայրկյան հավելումով յուրաքանչյուր քայլի համար:

Թայ-բրեյքն անցկացվում էր հետևյալ ձևաչափով.

թիմերի 4-րդ խաղատախտակները մրցում են միմյանց դեմ, հաղթողը շարունակում է պայքարը,  պարտվողը՝ դուրս մնում  Ոչ-ոքի արդյունքի դեպքում երկու մասնակիցն էլ լքում են պայքարը, իսկ եթե ոչ-ոքի է գրանցվում առաջին խաղատախտակների մրցավեճում, ապա կատարվում է գույների փոփոխություն և մրցամարտն անցկացվում է մինչև առաջին հաղթանակ: 4-րդ խաղատախտակների մրցամարտում Արտակ Մանուկյանը պարտվեց Չուո Ռուտոնին և դուրս մնաց պայքարից: Հաջորդ խաղում Կարեն Գրիգորյանը հաղթեց Ռուտոնին: 3-րդ պարտիայում պայքարը շարունակող Գրիգորյանը միավորը կիսեց Սյու Սյանյունի և երկու մասնակիցներն էլ դուրս մնացին պայքարից: 2-րդ խաղատախտակների՝ Սամվել Տեր-Սահակյանի Նի Հուայի, պարտիան նույնպես ավարտվեց հաշտությամբ և երկու շախմատիստն էլ լքեցին պայքարը:

Մրցաշարի հաղթողը պետք է որոշվեր Զավեն Անդրիասյան – Վան Յու մրցախաղում:

Զավեն Անդրիասյանը տրամադրվում է վերջին, որոշիչ պարտիային:

Անդրիասյան - Վան Յու պարտիան

Առաջին և երկորդ պարտիաներում մեր շախմատիստն ուներ առավելություն, սակայն երկու դեպքում էլ մրցակիցը կարողացավ հավասարեցնել խաղը: 3-րդ պարտիայում սևերով հանդես եկող մեր շախմատիստը կրկին ստացավ առավելություն և այս անգամ հաղթանակ տոնեց:

Հաղթանակից հետո...

Նշենք, որ մեր թիմին The Folsom Street Foundry երկրպագելու էին եկել Սան Ֆրանցիսկոյում բնակվող մեր բազմաթիվ հայրենակիցներ:

Այսպիսով Հայկական արծիվներ (Armenia Eagles) թիմը դարձավ Pro Chess League ակումբային մրցաշարի հաղթող:

Հաղթող թիմը պարգևատրվեց ոսկե մեդալներով:

Ավելացնենք, որ ակումբային այս մրցաշարին մասնակցում էին աշխարհի չեմպիոն Մագնուս Կարլսենը, հավակնորդ Ֆաբիանո Կարուանան, աշխարհի նախկին չեմպիոն Վիշվանաթան Անանդը, հանրահայտ շախմատիստներ Մաքսիմ Վաշիե-Լագրավը, Հիկարու Նակամուրան, Էթիեն Բաքրոն, Պենտալա Հարիկրիշնան, Վիդիթ Գուջրաթին, Դմիտրի Անդրեյկինը և այլն: