Նորություններ Subheading
տեղադրվել է 2018.03.25 03:02
Այս տարի մրցաշարին մասնակցում են 500 պատանի շախմատիստներ Երևանից, ՀՀ բոլոր մարզերից և Արցախի Հանրապետությունից:
Հայաստանի շախմատի ակադեմիայում այսօր մեկնարկեցին Հայաստանի պատանիների և աղջիկների առաջնության կիսաեզրափակիչ մրցաշարերը: Մեկնարկային տուրից առաջ տեղի ունեցավ մրցաշարի բացման արարողությունը: Մրցաշարի մասնակիցներին ողջույնի խոսքով դիմեց Հայաստանի շախմատի ֆեդերացիայի գործադիր տնօրեն Հրաչիկ Թավադյանը:
«Հայաստանի շախմատի ֆեդերացիայի անունից ողջունում եմ ձեզ Հայաստանի պատանիների և աղջիկների կիսաեզրափակիչ մրցաշարի բացման միջոցառմանը:
Առաջին հերթին ցանկանում եմ շնորհակալություն հայտնել մարզիչներին, ծնողներին և այն բոլոր մարդկանց, ովքեր հնարավորություն են ստեղծել որ դուք այսօր մասնակցեք կարևոր այս մրցաշարին:
Մրցաշարը ընտրական է Հայաստանի պատանեկան առաջնության, իսկ հետագայում Եվրոպայի և Աշխարհի առաջնությունների համար:
Հաջողություն եմ մաղթում ձեզ և վստահ եմ, որ յուրաքանչյուրդ արդար կպայքարեք հաղթանակի համար:
Մրցաշարի ընթացքում Հայաստանի շախմատի ֆեդերացիայի կողմից կկազմակերպվեն նաև մարզչական և մրցավարական սեմինարներ: »-մասնավորապես ասաց Թավադյանը:
Հրաչիկ Թավադյանը նշեց նաև, որ այս օրերին Հայաստանի առաջատար պատանի շախմատիստները՝ 18-ամյա Հայկ Մարտիրոսյանը, 17-ամյա Արամ Հակոբյանը, 16-ամյա Շանթ Սարգսյանը հաջողությամբ արդեն մասնակցում են Եվրոպայի տղամարդկանց առաջնությանը:
Այնուհետև մրցաշարի գլխավոր մրցավար, միջազգային կարգի մրցավար Նորայր Քալանթարյանն անցկացրեց մրցաշարի վիճակահանությունը:
Նշենք, որ պատանիների մրցաշարն անցկացվում է 5 տարիքային խմբերով՝ մինչև 10, 12, 14, 16 և 18, իսկ աղջիկներինը ՝ 4 տարիքային խմբերով՝ մինչև 10, 12, 14 և 16: Այս տարի մրցաշարերին մասնակցում են 500 պատանի շախմատիստներ Երևանից, ՀՀ բոլոր մարզերից և Արցախի Հանրապետությունից: Այս թիվը ռեկորդային է Հայաստանի պատանիների և աղջիկների առաջնության կիսաեզրափակիչ մրցաշարի համար: Ամենաշատ թվով մասնակիցներ կունենա աղջիկների մինչև 10 տարեկանների ենթախումբը, ինչը նույնպես առաջին անգամ է. նախորդ տարիներին ամենաշատ թվով մասնակիցներ են եղել մինչև 10 և մինչև 12 տարեկան պատանիների մրցաշարերում:
