Նորություններ Subheading

5-րդ տուրում Նայդիչի հետ պարտիայում պարտությունից հրաշքով խուսափած Մաթիաս Բլյուբաումը դարձավ մրցաշարի դեռևս  ամենախոշոր անակնկալի հեղինակը. գերմանացի երիտասարդ շախմատիստը առավելության հասավ աշխարհի նախկին չեմպիոն Վիշվանաթան Անանդի նկատմամբ: 5-րդ տուրի երկու անհաջողակների՝ Արկադի Նայդիչի և Գեորգ Մեյերի, պարտիան ավարտվեց Նայդիչի հաղթանակով:

6-րդ տուրի առաջին խորհրդանշական առաջին քայլը, Կարլսեն – Արոնյան պարտիայում, կատարեց մրցաշարի գլխավոր հովանավոր GRENKE AG-ի տնօրենների խոհրդի նախագահ Անտե Լեմինսկին:

Կարլսեն – Արոնյան պարտիայում Լեմինսկին կատարում է c4 քայլը

6-րդ տուրում առաջինն ավարտվեց Մաթիաս Բլյուբաում – Վիշվանաթան Անանդ պարտիան: Բլյուբաումը մատուցեց մրցաշարում թերևս մինչ այս պահը ամենախոշոր անակնկալը. գերմանացի շախմատիստը 45 քայլում հաղթեց աշխարհի նախկին չեմպիոն Անանդին: Պարտիայից հետո Բլյուբաումը բառեր չէր գտնում բացատրելու, թե ինչպես կարողացավ հաղթել Անանդին:  «Ես չգիտեմ, թե ինչպես հաղթեցի. սկզբնախաղում ես որևէ առավելություն չստացա և կարծում էի, որ պարտիան կավարտվի ոչ-ոքիով»-նշեց Բլյուբաումը: Ինչևէ, Անանդի 19…Փd5? քայլից հետո, Բլյուբաումը գտավ դիրքի ուժեղագույն քայլերը, իսկ 26.e4! քայլից հետո Անանդը արդեն չէր կարող խուսափել պարտությունից: Չնայած այս փայլուն հաղթանակին, որը երիտասարդ շախմատիստի կարիերայում թերևս ամենանշանակալին է, Բլյուբաումը համեստորեն ասաց, որ բավարարված է իր արդյունքից, իսկ պարտիաների որակից՝ ոչ:

Մաթիաս Բլյուբաումը 6 հնարավորից վաստակել է 3 միավոր

Տուրի կենտրոնական պարտիան Կարլսեն – Արոնյան դիմակայությունն էր: Պարտիայի մեկնաբան Լեկոն նշեց, որ պարտիան շատ հետաքրքիր ստացվեց: Կարլսենը և Արոնյանը 52 քայլը տևած դիմակայությունից հետո մեկնաբանեցին պարտիան:   Կարլսենը մասնավորապես ասաց. «Իմ կարծիքով որոշիչ էր 16...Rad8 քայլը, ես ունեի մի քանի հնարավոր քայլ, սակայն չէի կարողանում կողմնորոշվել, թե որն ընտրեմ»: Արոնյանին հարցրեցին, թե ինչու նա 40 րոպե ժամանակ ծախսեց 19-րդ քայլը կատարելու համար, որին Լևոնը պատասխանեց, որ ինքն այդ դիրքը վերլուծել էր տանը, բայց չէր հիշում թե ինչպես պետք է շարունակեր: Աշխարհի չեմպիոնն իր հերթին ավելացրեց, որ ոչ-ոքին ամենատրամաբանական արդյունքն էր պարտիայի համար:

Կարլսենը և Արոնյանը վերլուծում են պարտիան Պետեր Լեկոյի հետ

5-րդ տուրի երկու անհաջողակները՝ Արկադի Նայդիչը և Գեորգ Մեյերը մրցում էին միմյանց դեմ: Նայդիչը իր 5-րդ տուրի պարտիան որակել էր որպես իր կյանքի վատագույն պարտիա, իսկ 6-րդ պարտիայ իհամար նշեց, որ նա հաղթանակի հասնելու համար շատ պարզ ճանապարհ էր ընտրել՝ առաջ էր մղել հ զինվորը: Բարդ դիրքում Մեյերը 33-րդ քայլին կոպիտ վրիպում թույլ տվեց, որից հետո միանգամից անձնատուր եղավ:

Նայդիչը տոնեց մրցաշարում առաջին հաղթանակը

Նիկիտա Վիտյուգովը շարունակում է շատ ուժեղ խաղալ այս մրցաշարում: 6-րդ տուրում ռուս գրոսմայստերը ուներ թեթև առավելություն Մաքսիմ Վաշիե-Լագրավի նկատմամբ և վերջնախաղում երկար ժամանակ փորձում էր իրացնել այն, սակայն նրա մրցակիցը պաշտպանվեց շատ հստակ և ի վերջո պարտիան հաշտությամբ ավարտվեց:

ՄՎԼ-ից մեծ ջանքեր պահանջվեց ոչ-ոքիի հասնելու համար

Տուրի (ինչպես նաև ամբողջ մրցաշարի) ամենաերկար պարտիայումՀոու Յիֆանը շատ մոտ էր Ֆաբիանո Կարուանայի նկատմամբ հաղթանակ տանելուն:  Վճռորոշ եղավ 64-րդ քայլը. Կարուանան 5 վայրկյան մտածելուց հետո կոպիտ վրիպում թույլ տվեց, սակայն Յիֆանը պատասխան քայլի համար ծախսեց ընդամենը 3 վայրկյան և նույնպես սխալվեց: Հետագայում Յիֆանը փորձում էր ամեն հնարավոր ձևով հաղթել, սակայն 98-րդ քայլին կողմերը հաշտություն կնքեցին: Պարտիան տևեց ավելի քան 7 ժամ:

Հոու Յիֆանը շատ մոտ էր Կարուանային հաղթելուն

Մրցաշարի վերաբերյալ ամբողջական տեղեկատվությանը կարող եք ծանոթանալ մրցաշարի էջում: